ElKnaba Party

Just another WordPress.com site

Archive for the tag “مرسى”

التعليم فى عصر النهقة


التعليم: ” الآى باد” بديل عن الكتاب في الفصل الدراسي الثاني

أعلن الدكتور إبراهيم غنيم وزير التربية التعليم ، أن الفصل الدراسى الثانى من العام الدراسى الحالى، سيشهد بدء تطبيق تجربة “أسبوع بلا حقيبة” فى 3 مدارس ، سيعتمد طلابها على أجهزة (أى باد) كبديل عن الكتاب المدرسى ، مطالبا الطلاب بالدخول على موقع الوزارة ووضع مقترحاتهم لتطوير الكتاب المدرسى.

جاء ذلك خلال زيارة الوزير بمحافظة القليوبية صباح اليوم “الاثنين”، وعقد لقاء مع مديرى الإدارات التعليمية ومسئولى التعليم بالمحافظة.

…..

ء

….

الكلام ده قاله وزير التعليم بعد كم “كلام” عن المناهج وتطوير اسلوب التعليم وغيره من الكلام الحلو اللى على طول بيتقال لكن مفيش اى تحرك ملموس فى هذا الموضوع وطبعا بس شوفنا اضافه لحسن البنا فى كتب التاريخ وشيل حلايب وشلاتين من خريطه مصر فى الجغرافيا حتى الان .. وطبعا مشكله التعليم موجوده عندنا من زمن طويل والنظام القديم كان بردو متخاذل فيها . والحق يقال ان كان فى اخر كام سنه فى اتجاه لتطوير المدارس وتم بالفعل العمل على كم مدارس كتيره فى مناطق محتاجه ولكن لسه الشغل كتير علشان نحس باختلاف شكل التعليم فى بلدنا

لكن السؤال لوزير حكومة النهقة

السؤال الآى باد على مين !!!!

وبعدين تجربة ايه اللى تشمل 3 مدارس فقط دى!!
تركيا والصين وزعو بديل الآى باد من الصناعه المحلية او تدعيمه للطلبه مش بالاستخفاف ده !!
وبعدين الاول يكون فيه تعليم حقيقى!!

ومناهج محترمه!!

وفصول!!

ومعلم ياخذ ما يستحق!!

وطلبه لهم اماكن!!

ومكان للرياضه!!

واهتمام بالفهم والتوعيه ليس بالحفظ!!!

وتطوير مناهج لتكون على مستوى مقبول عن هذه المناهج المنتهيه صلاحياتها اصلا!!!

احنا شعب متدين بطبعه


اتضح ان الناس اللى كانت بتطلب “عيش .. حرية .. عداله اجتماعية” من يوم 25 يناير .. اللى كان منهم ليبراليين وعلمانيين بردو كان قصدهم انهم عيزينها اسلاميه بس هما اللى مش وخدين بالهم!! لان احنا شعب متدين بطبعه

وبالتالى حصل تعديل بسيط على شعارات 25 يناير ليتحول الى 

” العيش .. للحرية والعدالة .. الاخوانية “

ikhwan

وكالمعتاد الناس هتبتدى تقول ان كده انا ضد “الاسلام” .. لكن هو مين قال ان قبل كده مثلا كنا كفار!! وبعدين مين قال ان الاسلام بتعاليمه حكر على فصيل او اخر!!!؟

بالفعل كنت اتمنى ان ارى الشعب – المتدين بطبعه – عايشين بمبادئ الدين السليمه اسلاميا او مسيحيا ايضا وكنت انتظر من الاخوان ان يشاركو فى الحياه السياسية طبعا ولكن ليست كحكر عليهم وعلى من يوافقون عليه وكنت اتمنى ان يطبقوا شعارهم “واعدوا” ويكون فيه اعداد حقيقى ببذرة فكر البنا من حيث ان يكون الشاب صالح الخلق والجسد والفكر ايضا وان يعدوا المجتمع كجزء منه بنشر فكر متدين متطور وسطى كما اعتادو ذكر هذه الجوانب وليس فقط فكر للسيطره السياسية .. وايضا تمنيت من السلفيين الذى كان مشكلتهم كما يقولوا ان النظام السابق كان يمنعهم من الدعوه فى سبيل الله ويمنع بعض المشايخ من الخطب مثلا فكنت اتمنى ان يقوموا بما منعوا منه من الدعوه اكثر من اهتمامهم من الدخول فى السياسة ومحاولة اظهار القوى والمنافسه بكل قوة فى هذا المجال فقط .. حتى تغير الفكر الدينى للمصلحه السياسية من الافتائات المناسبة سياسيا والتكفير للمعارضه وما الى غيره .. مع العلم ان احنا شعب متدين بطبعه

ikhwan and salaf

واحنا طبعا كشعب متدين بطبعه .. بعيد عن كم الحوادث الغريبة اللى عندنا من سرقة وقتل وتحرش ودعارة ومخدرات والخمور اللى موجوده عندنا !! .. وايماننا الشديد  بيبان اوى لو شفنا حد بيضرب طفل مثلا فى الشارع لازم نقولة “حرام عليك” مش بنقوله حتى ده غلط !!! ودى اكثر ظاهرة دينية عندنا

واحنا طبعا شعب متدين بطبعه .. مع ان التحرش عندنا من كبار وصغار وحتى ستات كمان بيتحرشو!! والتحرش دلوقتى ظاهرة عادية جدا طبعا وكمان بالذات فى المناسبات والاعياد كنوع من انواع الاحتفالات عندنا والتحرش للجميع حتى كمان للمحجبات اكثر!! غير طبعا كدولة متدينه وسياحية فاكثر نسبة تحرش لو اى سائحه فكرت انها تنزل تتمشى فى شوارع مصر الامان  ممكن ميفضلش فى جسمها حته غير لما تكون اتلمست طبعا .. مع العلم ان اغلب الاجانب فى مصر – والقاهرة بالاخص – بيكون عندهم تعليمات ان احنا دولة “متدينه بطبعها” فلما بينزلو الشارع بيكونو دائما لبسين لبس  واسع ومش شفافا الا قليل منهم .. وفيه عندنا مراحل غير التحرش كمان .. فيه كمان اغتصابات كتير- اكتر من تخيلنا فعلا – فلما نلاقى جمعية خيرية تعمل فرع للامهات الصغيرات ” المغتصبات”  ونلاقى الشعب المتدين بطبيعته يتدايق من فكرة مساعدتهم دول بالذات وساعات يشترط ان المساعدات متكنش للفرع ده بالذات

احنا عندنا حوالى 14 الف طفل بيتولد كل سنه من علاقة غير شرعية !!! ودول اللى اغلبهم بنشوفهم كاطفال شوارع وبنقرف ساعات منهم !! احنا كشعب متدين بطبيعته عندنا مليون ونص الى 2 مليون طفل شوارع .. وعندنا 1 من كل 5 طلاب فى الجامعة متزوج سرا “عرفيا” .. طبعا ده غير البنات اللى بتبيع نفسها حتى لو ب20 جنية ولا باى حاجه علشان تاكل 

واحنا طبعا كشعب متدين بطبعه .. بردو تلاقى حوادث قليله زى قتل ابن لامه او قتل ابن لابيه او حتى العكس والاجدد ظهور حوادث اغتصاب داخل الاسر او زنا محارم ايضا 

واحنا طبعا كشعب متدين بطبعه .. مع وجود الخمرة من زمان لكن تشوف مظاهر التدين فى ان البارات مقفولة فى مولد النبى وليلة راس السنه الهجرية .. واللى طبعا المناسبتين دول السلفيين اصلا ضد الاحتفال بيهم باى شكل .. لكن المشكلة الاكبر والاخطر والاكثر انتشارا هى كم الحشيش والمخدرات المنتشر بشكل غير مفهوم بين كل فئات الشعب من اعلى مستوى اى ادنى مستوى اجتماعى ايضا .. وبالنسبة للبرشام اللى دمر اغلب شباب المناطق العشوائية على جميع الاعمار .. لكن اكثر حاجه بتجننى كمان هى حرمانية الخمور فقط عند البعض – وهم كثيرون – ولكن المخدرات كنباتات فهى مش حرام اوى والالطف الشيوخ الحشاشين او الافيونجية!! على اعتبار انه نبات منبة منشط .. وده فكر موجود من مجاهدين افغانستان لغاية المقري اللى فى مدافن البساتين

الغريب بردو عندنا كشعب متدين بطبيعته .. تلاقى فى رمضان بس كم حملات الدعاية للجمعيات الخيرية اللى بتحاول تعمل دور فى البلد .. ولو رحت تزورها هتلاقى كمية معقولة تفاعلت مع الاعلان ولكن بعد رمضان لغاية السنه اللى بعديها محدش بيروح غير يدوبك كام واحد ويفض الطفل اللى عنده سرطان ولا اللى عنده مشكلة فى القلب ولا الاعمى ولا القرى الفقيرة كلة منتظر رمضان اللى بعده علشان الشعب المتدين بطبعه يفتكره مره تانية .. غير كمية الناس اللى بتتفرج على الاعلانات دى وتقرف او كمان تشكك فى الجمعيات دى وتقول انهم نصابين طبعا .. وفيه اللى بيتعاطف مع الموضوع ويبقى نفسه يروح لكن يفضل لغاية مايشوف الاعلان فى رمضان اللى بعده ويقول ده انا نفسى اروح فعلا السه دىوبردو مايروحش .. وفيه ناس كتير بتعتاد الفرجه فقلبها يجمد ويفقد حتى التعاطف 

وبردو علشان احنا شعب متدين بطبعه .. فكان فى البرلمان زمان مجموعه اخوانية لما كانوا محظورين وكان فيهم نائب اسمه مرسى العياط – اللى ربنا كرمه بعد كده وخد مصر- وهالنائب ده هاجم الحكومة علشان مره بتتكلم عن القروض وقال ان ده طبعا ربا .. وياما كنا نشوف اسئله فى كل القنوات الاسلامية بتسئل عن القروض والفوائد والشيوخ كانت دائما تقول ان ده ربا طبعا .. وفيه منهم بس اللى كان يحللها للناس لعدم وجود البديل بس وياما قالو الشيوخ السلفيين لاتباعهم على ان اللى بيحصل لمصر ده كله من امال الربا والقروض .. الغريب ان نفس الاشخاص المتدينين بطبعهم دول اللى بيحللوا الربا والقروض لما بيحكموها الفكر الاسلامى واللى عايزينها تبقى اسلامية دلوقتى .. على اعتبار انها كانت بوزيه قبل كده!! مع قله دلوقتى لسه فيهم الخير وعلى نفس مبدائهم 

واحنا كشعب متدين بطبعه .. طبعا الظواهر دى لما تناقشها مع اى حد من المتدينين بطبعهم يقولك من ده كله من فساد النظام السابق وفساد الاعلام والافلام والانفتاح الزائد!! على اعتبار ان احنا فعلا دولة منفتحه فكريا او ثقافيا !! مع العلم ان زمن الفن الجميل كما يسمى – مع اعتراضى على هذا المسمى طبعا – اعتقد ان هو ده الزمن اللى كان فيه نسبة الرقاصات اللى فى الافلام اكثر بكثير ومع جرئة اكثر فى الفن ومع الاستعراضات ووجود فنانات اغراء وايضا كانت الموضه اصلا المينى والميكروجيب فى الشوارع وقله الحجاب وانعدام النقاب وندرة الذقون!!؟ 

wake up

فى كل الاحوال انا كموحد بالله غصب عن اللى يعترضو على كلامى ويحولوه من نقض سياسى لتكفير .. لا يشرفنى تيار الدين السياسى بادائة حتى الان .. من نوعية النواب المتحرشين والمتجملين والنصابين ومن نوعية حرامية الاثار والسولار وتجار السلاح ومن نوع الممولين اللى ليهم انتمائات وولاء لجهات اخرى غير وطنى ودينى .. ومن نوع اللى مش عارفين امهم جنسيتها ايه اصلا مثلا ومن انواع تجار الدين وتجهيز فتاوى مخصوصه وتغيير اراء وفتاوى ايضا لمصلحة الكرسى واتباع الكرسى فقط ومحللين الربا 

وفعلا الغريب ان احنا وصلنا لدرجة ان العلمانيين بيحاولو يقنعو الاسلاميين ان الاقتراض من صندوق النقد الدولى مثلا بالفوائد دى حرام والاسلاميين السياسيين واتباعهم من القطيع المطيع هما اللى مش مقتنعيين

ibn elayat

ونموزج كمان من ان احنا شعب متدين بطبيعته والرمز احمد مرسى العياط !! .. وياريت يا جماعه حد يقول للشب احمد ابن العياط يخلية فى حاله وميدخلش نفسه فى لجنة الدفاع عن السياسة الرشيده لمكتب الارشاد اللى ابوه بيخدمهم لغاية النهارده ويفهم ان التبرير المستمر معناه محاوله لتجميل الكوارث والافعال المتخلفه الصادرة منه ومن اللى مشغل ابوه وعشيرته .. وياريت بردو مش كل شوية يحسبن على الناس ويخوفهم بالادعية والايات ومحاولة تقديس ابوه بحزبة وهو اصلا لما اتبعتله لينك على فيديو خليع راح دايس عليه علشان يتفرج على طول .. وبردو بعديها لما اتقاله ان ايه ده راح طالع بكلام دين لنفى الحدث اصلا والحسبنه على الناس ادعاء الظلم والكلام ده .. اما انك تلعب بالشكل الدينى او تلعب بالشكل السياسى او حتى الفكرى بس ياريت مندخلش كل حاجه فى بعض 

يا ناس حرام تظلموا الاديان بافعالكم دى يا احقر سفراء لدينكم ووطنكم يا شوية دقون عيره 

الثورة مستمرة!!؟ .. ثورة!! وكمان مستمرة!!؟


الثورة مستمرة !!!!
ثورة !!!!!!؟؟؟؟؟؟؟؟ وكمان مستمرة!!!!!!!!!!!!؟

اعتقد ان النتايج اللى شيفينها لغاية دلوقتى دى فى فرز التصويت للانتخابات الرئاسية بتثبت ان اصلا مكنش فيه حاجه اسمها ثورة اصلا حصلت!!!

المنافسه مابين “مرسى” الاستبن اللى نازل ببرنامج صاحبة واللى لما يمسك المرشد هيحكم بالتدليس والتلون واللعب على الغلابة باكياس الاكل المعتاده قبل كل موسم شراء اصوات واللى هو من حزب لو فيه حد بيقول ان “العصابه” القديمه كلها مناسبة بعضيها فدول كلهم متجوزين اخوات بعض غير الفلوس والعلاقات المشبوه الكتير اللى محدش عارف مصدرها وطبعا عداء الاخوان الكبير لامريكا اللى هو اصلا ولاده متجنسين امريكانى !!! ولو قولنا الاخوان فهنتكلم كتير اوى على تاريخ زباله من بعد الامام الشهيد البنا .. وبعدين لو الملك اتهضدهم وناصر والسادات ومبارك .. يبقى اكيد كلهم هما اللى وحشين وهما مظلومن على طول الخط!!!

والمنافس معاه “شفيق” اللى بيحسب على الفلول طبعا واللى كل شوية حد بردو يقول “بلاغ” عليه فى اى حاجه بس الهييصه بيظيطو ويحولو “البلاغ” لاتهام اصلا قبل مايسمعو الرد او يفكرو فى الكلام بجد وحتى لو اترد عليه اصلا فاحنا عندنا مشكلة ودان فى شعبنا طبعا غير خلايا المخ اللى راح منها كتير كمان !! وبعدين مفيش اى حد بيحاول يفكر فى مصطلح فلول ده اصلا وايه معناه !! بس هى كلها بغبغانات صحيح!!

والمنافس الثالث “2 حمد الصبح” اللى هو واحد منهم بالمياه الغازية والعربيه الهمر اللى لف بيها فى لفت الدعاية.. ولو واحد مننا فعلا صرف الدعاية الانتخابية من اين !! هو فيه واحد مننا معاه فلوس!!!!!؟؟ وده اكتشفوا انه ثوري فى اخر 10 ايام علشان ابو الفتوح اللى مش اخوانى وهو عنده جوه اتكشف شوية للبيحاول يفكر!! .. والاخ 2 حمد اصلا هو فعلا ثورى جدا .. لكن على قديمه .. ده بيتكلم فى ثورة 52 اصلا .. الناصرى اللى مع فكرة لا للعسكر!!! ده طبعا على اعتبار ان ناصر كان دكتور سنان يا جماعه!! وهو بردو واخد من ناصر خطبة الرنانه بس فى زمن انتها فيه الكلام ده .. غير عشقه طبعا لصدام وشيكاته والقذافى وشيكاته وعائله الاسد لو بتدفع فلوس علشان حتى الجرنال اللى كان بيتطبع منه كام نسخه ده ومحدش بيشوفه اصلا يفضل شغال!! واما بالنسبة للشيعه فملناش دعوه!! .. وبالنسبة لبنته اللى بتشتغل عند ابو العنين ؟؟ هو مش ده فلول !!!!

اما الرابع فده عم “ابو الفتوح” اللى هو مش اخوانى بس هو عنده جوه اللى هو مش معترف باسرائيل لكن لو فى تسجيل لقناه انجليزى بس يبقى ماشى!! وهو طبعا ياجماعه ابو البطاطين الليبرالى بتاييد الجماعه الاسلامية!!!! اللى بيهين السادات اللى مفيش كلب فى اسرائيل مش حاسس انه ده الوحيد اللى علم على قفاهم !! اللى اغلب الناس اللى بتاييده معاه علشان طيب ؟؟؟ وكانه مش اخوانى؟؟!!!! وهو متعود حوالى 40 سنه على نظام فيه قدسية المرشد والسمع والطاعه والميكافيليه بس بدقن وخفيفة مش طويله اوى!!!

ومننساش “موسى” الشهير بعبده مشتاق .. اللى مش عارفين هو عايز ايه او مع مين او ضد ايه اصلا!! يعنى انت مش فلول وانا المفروض اصدق!! انا مش انا يا دكتور!!

…….
اما عن “احداث يناير” وقربها من المرشحين .. فمفيش اى حد ليه دعوه وعلى ما اتذكر ان الناس مكنش مطلبها الدوله “الاسلامية” مثلا كمطلب شعبي!! ده كان الوتيره اللى ماشية شيوعيه او الاشتراكيه اللى خلصوا من الدنيا اصلا ملهاش فى الاسلاميات خالص فى اول كام شهر مع وجود الاخوان المتاسلمين على الارض فى المجاميع فى الاول اه .. لكن ده كان كل واحد عايز حاجه غير التانى .. وبعدين بردو حتى الحكم الاسلامى لما يكون عندنا اسلاميين نشوف فيهم اخلاق الاسلام مش نصابين بدقون -الا من رحم ربى- .. وحقيقى لو هنتكلم عن مرشح تابع لفكر “احداث يناير” فنقول خالد على -وده مش المغنى الفاشل- لكن حتى ده يعينى ممكن ياخد فى الاخر حوالى 100 الف صوت بس

وبعدين السؤال المهم جدا علشان رجاله “النظام القديم” الوحش اللى لازم كلهم يعدموا اصلا والجو ده .. طيب هو ايه “النظام الجديد”؟؟؟؟؟؟ ومين رجالته؟؟؟ وايه ابعاده وافكاره ورموزه!!! بعيد عن رموز “احداث يناير” بداية من تاجر المخدرات او البت اللى قلعت ملط او طقم الملحدين وشوية الكذابين على محبين الشهره على المهمشين وشوية فنانين كذابين سكرانين على المتاجرين باى حاجه واللسته كبيره اوييييي ..

من انتم صحيح!!!!!!!!!؟؟؟؟؟؟؟؟؟؟؟؟؟؟؟؟؟؟؟؟؟؟؟

طبعا اى حد يتهمنى من جو البغبغانات بكلمة فلول لازم يقولى هو ايه نوعه وايه عكس فلول اللى انا المفروض اكون زايه فيها ؟؟

Post Navigation